Aron Elís Þrándarson, landsliðsmaður í fótbolta, gæti verið að semja við sænska stórliðið Helsingborgs IF. Frá þessu greinir sænski fótboltavefurinn Minboll.
Í fréttinni segir að félagið hafi þegar boðið Aroni samning, en hann er á leið frá norska liðinu Álasund þar sem hann hefur leikið frá árinu 2015. Álasund hefur leikið í næstefstu deild Noregs undanfarin tvö tímabil en liðið komst upp í efstu deild á nýliðnu tímabili. Þó hafði það legið fyrir lengi að Aron færi frá félaginu eftir tímabilið.
Í viðtali við Fótbolti.net í nóvember sagði Aron að hann vildi prófa eitthvað annað en Noreg.
„Danmörk, Svíþjóð, Holland og Belgia eru allt spennandi kostir. Vonandi verður allt klárt áður en það kemur nýtt ár,“ sagði hann.
Helsingborgs IF er eitt af stærstu félögum á Norðurlöndunum og hefur það orðið sænskur meistari fimm sinnum, síðast árið 2011. Þekktasti leikmaðurinn í sögu félagsins er án efa Svíinn Henrik Larsson sem gerði garðinn frægan með liðum eins og Glasgow Celtic og Barcelona en auk þess spilaði hann um skamma hríð sem lánsmaður hjá Manchester United.
Einn íslendingur er á mála hjá Helsingborgs í dag en það er Akureyringurinn Daníel Hafsteinsson. Aron Elís á fjóra landsleiki að baki fyrir íslenska landsliðið og var í landsliðshópi Íslands í leikjunum gegn Tyrklandi og Moldóvu í nóvembermánuði.