Watford hefur ákveðið að reka knattspyrnustjóra sinn Quique Sanchez Flores eftir aðeins tíu leiki við stjórnvölin.

Þetta staðfesti félagið í dag en Watford tapaði 2-1 gegn Southampton í úrvalsdeildinni í gær.

Javi Gracia var rekinn frá Watford eftir fjórar umferðir á tímabilinu og var Flores ráðinn til starfa á ný.

Hann var að taka við Watford í annað skiptið en félagið gaf honum ekki mikinn tíma og rak hann í dag.

Flores stýrði Watford frá 2015-2016 áður en hann tók við Espanyol og síðar Shanghai Shenhua í Kína.

Watford situr á botni deildarinnar með aðeins átta stig eftir 14 umferðir og er útlitið ekki bjart á Vicerage Road.