Sindri Sverrisson, blaðamaður á Morgunblaðinu ætlar að fagna með Finnum á morgun, þegar þeir tryggja sig að öllum líkindum inn á sitt fyrsta stórmót í knattspyrnu karla.
Finnar mæta þá Liechtenstein á heimavelli, sigur þar kemur liðinu á Evrópumótið á næsta ári.
,,Það verður auðvelt að samgleðjast Finnum tryggi þeir sér sæti á EM á morgun. Þar með yrði karlalandslið þjóðarinnar í fótbolta með á stórmóti í fyrsta sinn næsta sumar. Þeim dugar að vinna lærisveina Helga Kolviðssonar í Liechtenstein í Helsinki og finnska þjóðin hleður svo væntanlega í góða sigurhátíð í kjölfarið, ef til vill með landsliðsmönnunum sjálfum á miðbæjartorgi líkt og haustkvöld eitt í Reykjavík 2015,“ skrifar Sindri og minnist þess þegar Ísland tryggði sig inn á Evrópumótið árið 2016.
Ísland vann Finna með eftirminnilegum hætti árið 2016, þá urðu Finnar öskureiðir og Sindri rifjar það upp.
,,Ég mun samgleðjast Finnum ef til vill meira en ella vegna þess með hve „ljótum“ hætti við unnum þá á Laugardalsvelli í undankeppni HM. Ég hef engan séð eins illan og lýsanda finnska sjónvarpsins, sessunaut minn á leiknum, sem reif af sér heyrnartólin eftir leik og reifst og skammaðist, uppfullur af réttlátri reiði. Ísland skoraði nefnilega tvö mörk á lokamínútunum, í 3:2-sigri, og sigurmarkið átti klárlega ekki að standa.“
Þennan leik má sjá hér að neðan.