Eiður Smári Guðjohnsen, er gestur hjá Loga Bergmann, í þætti sem er kominn í Sjónvarp Símans Premium. Þessi magnaði íþróttamaður ræðir sögu sína opinskátt.
Eiður ræðir meðal annars tíma sinn í London, hjá Chelsea. Hann gekk í raðir félagsins 22 ára gamall. Ungur, frægur og ríkur. Logi spurði hann út í hvernig væri að taka á slíku, að fara ekki fram úr sér.
,,Maður gerir sín mistök eins og allir aðrir, við vorum oft barnalegir í hegðun innan æfingasvæðisins eða utan þess. Við áttum það til að fara út og skemmta okkur sem lið, það var alltaf eitthvað í okkur sem sagði samt, að að yrði enginn aumingjaskapur daginn eftir. Það væri æfing, það yrði tekið á því,“ sagði Eiður við Loga.
Enska pressan er þekkt fyrir að taka leikmenn í landinu af lífi, Eiður segir að það geti verið erfitt að eiga við hana.
,,Hún er erfið, það var nóg að það væri tekinn mynd af þér með bjór. Þá skrifuðu þeir að þú hefðir verið til fimm um morguninn. Þó að þú hafir bara verið úti að borða, alveg sama hvað það var. Það var ýkt, maður verður að taka ábyrgð á því. Maður var ekki alltaf upp á 10,“ sagði Eiður Smári og viðurkennir þar að hann hefði stundum getað gert hlutina betur.
Honum var eitt sinn slátrað af enskum blöðum, þá var hann grunaður um ölvunarakstur en var allsgáður. Pressan í Bretlandi hafði lítinn áhuga á staðreyndum í því máli.
,,Það er ekkert sérstakt, þú keyrir upp á æfingasvæði og finnst eins og allir séu að horfa á þig. Sunnudagspressan, Englendingar vissu að það var slúðrið,“ sagði Eiður.
Hann rifjaði svo upp atvikið frá 2005, þegar hann var grunaður um að hafa keyrt ölvaður. ,,Ég lenti einu sinni í það að vera stoppaður að keyra á leiðinni heim, var grunaður um ölvunarakstur. Ég fór niður á lögreglustöð og þar kom í ljós úr blóðprufu, að ég var ekki með áfengi í blóðinu. Sagan er kominn út, þú þarft að byrja að eiga við hana. Þegar kom í ljós að ég var ekki ölvaður að keyra, þá var það ein lítil setning. Það er svo margt sem getur sitið eftir út af fyrirsögn. Ég var samt alls enginn engill, sem var með allt upp á 10.“