Raheem Sterling, leikmaður Manchester City, verður ekki með enska landsliðinu í undankeppni EM á fimmtudag. Þetta var staðfest í gær en Gareth Southgate, landsliðsþjálfari, gaf frá sér stutt skilaboð.
Þessar fregnir voru staðfestar stuttu eftir að greint var frá heiftarlegu rifrildi Sterling við Joe Gomez á æfingu enska liðsins.
Sterling og Gomez höfðu átt í átökum á sunnudag þegar Liverpool vann góðan sigur á Manchester City.
Ensk blöð segja að Gomez og Sterling hafi skipst á orðum í matsal enska landsliðsins. Sterling varð afar reiður og reyndi að taka Gomez hálstaki, áður en stigið var á milli þeirra. ,,Bæði ég og Gomez höfum rætt málin og haldið áfram,“ sagði Sterling.
,,Við erum í íþrótt þar sem tilfinningar spila stórt hlutverk og ég get alveg viðurkennt það þegar þær bera mig ofurliði. Það er allt í góðu milli mín og Gomez, við vitum að þetta var 5-10 sekúnda dæmi.“