Það voru fagnaðarfundir á Anfield í gær þegar Sean Cox, stuðningsmaður félagsins mætti á sinn fyrsta leik í rúmt ár. Cox varð fyrir fólskulegri árás árið 2018, þegar hann var á leið á leik Liverpool og Roma.
Cox slasaðist alvarlega eftir árásina en hefur síðan þá verið í endurhæfingu, batinn er talsverður en Cox er þó fastur við hjólastól. ,,Ég hitti Sean eftir leik, það var magnað,“ sagði Jurgen Klopp, stjóri Liverpool eftir 3-1 sigur á Manchester City i gær.
,,Það var virkilega gaman að hitta á hann. Hann var glaður að hitta mig, ég var jafn glaður að sjá hann aftur á vellinum.“
Sean hefur gengið í gegnum erfiða tíma en það gleður hann að sjá sitt félag, á toppi ensku úrvalsdeildarinnar. Liverpool er með átta stiga forskot á toppi deildarinnar og er líklegt til þess að vinna loks deildina eftir 30 ára bið.
,,Þetta var afar gott, hann var með konunni sinni og stráknum. Þetta var frábær dagur fyrir þau. Ef hann flytur í borgina þá gefum við honum ársmiða.“
,,Það skipti leikmenn liðsins máli að vita af því að Cox væri að koma á leikinn, að hann gæti verið með okkur.“