Sagt var frá því í Expressen að leikmaður í sænsku deildinni hafi verið handtekinn í Stokkhólmi í vikunni. Samkvæmt heimildum Fréttablaðsins er um að ræða Kolbein Sigþórsson, landsliðsframherja Íslands.
Í frétt Expressen kemur fram að leikmaðurinn hafi á miðvikudag verið handtekinn. Hann hafi verið ölvaður og átt í deilum við dyravörð í Stokkhólmi. Um er að ræða Kolbein Sigþórsson, hinn 29 ára gamla landsliðsmann í knattspyrnu. Sagt er að Kolbeinn hafi verið lengi fram eftir á næturlífinu og veitt mótspyrnu við handtöku. Hann var handtekinn klukkan 03:00 samkvæmt frétt Expressen. Kolbeinn var settur í fangageymslu en AIK, lið Kolbeins neitar að tjá sig.
Margir stuðningsmenn AIK, hafa rætt málið í dag á samfélagsmiðlum. Flestir sýna framherjanum knáa, mikinn stuðning. Hann hafi gert mistök. Aðrir kalla eftir aðgerðum af hálfu AIK, en þeir eru í minnihluta.
Blaðamaður skoðaði stuðningshóp félagsins á Facebook sem telur 26 þúsund einstaklinga, þar var umræðan lítil en flestir töldu að framherjinn hefði gert mistök, og vonuðu að hann myndi læra af þeim. Sænska deildin klárast á morgun en Kolbeinn er á sínu fyrsta tímabili í Svíþjóð.
,,Það sem er mest spennandi við leik AIK á morgun, er hvernig fjarvera Kolbeins verður útskýrð,“ skrifar Frederik G, stuðningsmaður félagsins. Honum er svarað af öðrum stuðningsmanni. ,,Það er skandall ef hann spilar ekki.“
Nills Aurell kallar eftir því að félagið styðji við bakið á framherjanum knáa. ,,Starfsfólk AIK verður að taka ábyrgð, hlusta á Kolbein og sjá hvernig staðan er. Svo er að hjálpa honum aftur á rétta braut, leyfa honum að bæta ráð sitt.“
Patrik Brolin útskýrir hvað gæti hafa gerst. ,,Þú ættir að passa þig að kalla þetta vandamál, gæti hafa verið kvöld þar sem hann var illa upplagður. Flest fólk lendir í því einu sinni, að fá sér of mikið.“
Björn Teitsson hefur reynslu af næturlífi í Stokkhólmi ef marka má hans færslu á Twitter. ,,Mjög gott að hafa í huga í þessu Kolbeinsmáli að hann var handtekinn á djamminu í Svíþjóð, það er lykilatriði. Ég hef sko séð mann snúinn niður í Stokkhólmi fyrir að hlæja of hátt að brandara og konu hent út fyrir að vera á þriðja á hvítvínsglasinu á innan við klukkutíma,“ skrifar Björn á Twitter.
Katrín Atladóttir, borgarfulltrúi Sjálfstæðisflokksins leggur orð í belg. ,,Hefði viljað sjá forsetann okkar beita sér í þessu máli eins og Trump gerði í máli A$AP Rocky,“ skrifar Katrín en Trump hjálpaði rapparanum að losna úr fangelsi á dögunum.
Broke Allice skrifar. ,,Ég vona innilega að Kolbeinn byrji á morgun, annað er skandall.“
Atte Andersson skrifar svo. ,,Ég vona að þetta séu ekki endalok Kolbeins hjá AIK, næsta ár verður hans. Við þurfum hans, hann ætti að gefa viku laun til unglingastarfs AIK og biðjast afsökunar. Þá er málinu lokað og allir halda áfram.“
Sumir kalla eftir því að AIK, rifti samningi sínum við Kolbeinn. Svona hegðun leikmanns sé ekki boðleg, þremur dögum fyrir leik hjá félaginu.