,,Svona er bara staðan, maður verður að svara þessum spurningum,“ sagði Birkir Bjarnason, landsliðsmaður Íslands við okkur í dag. Þessi knái spilari er án félags, hann rifti samningi við Aston Villa í ágúst.
Hann bíður eftir spennandi tilboði en á meðan reynir hann að halda sér í formi fyrir íslenska landsliðið.
,,Það hefur verið margt í gangi síðan síðast, það hefur ekki verið það sem hefur verið rétt fyrir mig. Þannig er staðan. Ég er opinn fyrir öllu, þetta verður að vera rétta skrefið fyrir mig persónulega.“
,,Ég er búinn að vera á fullu, æfa bæði hlaup og lyftingar. Líkamsformið ætti ekki að vera neitt vesen, það er meira leikformið.“
Aron Einar Gunnarsson, fyrirliði Íslands verður ekki með gegn Frökkum og Andorra. Það er því líklegt að Birkir verði beðinn um að leysa hlutverk hans.
,,Ég er tilbúinn í það hlutverk sem ég er beðinn um, ég geri mitt besta. Ég hef leyst þessar stöður áður, ef ég spila þar þá geri ég mitt besta. Vonandi getur þetta verið eins og áður.“
Viðtalið við Birki er í heild hér að neðan.
