Óskar Hrafn Þorvaldsson var gestur hjá BlikarTV í dag og fór þar yfir ýmis mál í samtali við heimasíðu Breiðabliks.
Óskar er nýr þjálfari Breiðabliks en hann tók við af Ágústi Gylfasyni eftir tímabilið í sumar.
Hann var orðaður við starfið á meðan Ágúst var enn þjálfari liðsins og var Óskar þá hjá Gróttu.
Óskar viðurkennir að sú umræða hafi farið í taugarnar á sér sérstaklega á meðan Ágúst var í starfi.
,,Ég væri að ljúga ef mér hefði ekki fundist hún pínu óþægileg, það er ekki þægilegt að vera spurður út í starf sem kollegar manns eru að sinna,“ sagði Óskar.
,,Mér fannst það ákveðið virðingarleysi gagnvart Gústa þegar það var verið að ræða um eftirmenn hans þegar hann var að gera fína hluti í fullu starfi. Ég missti ekki svefn yfir þessu og var ekki að hugsa um það allan daginn.“
Óskar fór svo aðeins yfir sjálfan sig en það eru ekki allir sem kannast við hans sögu.
Óskar hefur alltaf verið harður KR-ingur og vann lengi hjá félaginu áður en hann hélt til Gróttu.
,,Ég er 46 ára gamall, þriggja barna faðir, giftur Laufey Kristjánsdóttur í 21 ár núna 7. nóvember. Ég er Vesturbæingur borinn og barnfæddur og eini KR-ingur fjölskyldunnar.“
,,Þetta byrjaði allt vestur í bæ 30 metrum frá KR-heimilinu. Þar byrjaði ég og ég spilaði aldrei með öðru liði en KR og hafði aldrei þjálfað annað lið en KR áður en ég fór til Gróttu þar sem börnin mín voru.“