Börkur Edvardsson, formaður knattspyrnudeildar Vals ræðir fjármál íslenskra knattspyrnuliða við Fréttablaðið í dag. Hann segir það þjóðsögu að Valur eigi kistu fulla af gulli.
Félagið hefur hins vegar verið afar vel stætt síðustu ár, það á ekki bara við í fótboltanum. Félagið hefur verið með vel mönnuð lið í fótbolta, handbolta og körfubolta, bæði karla og kvennamegin.
Valur hefur oft sópað til sín stórum bitum á leikmannamarkaðnum en lítið hefur gerst í vetur í fótboltanum. „Við erum ekki í Evrópukeppninni á næsta tímabili, þar af leiðandi þurfum við að passa okkur enn frekar og fara varlega. Við erum í stöðu sem við ætluðum okkur ekkert að vera í. Ég veit ekki alveg hvaðan þetta kemur, sú umræða að Valur eigi alla þessa peninga,“ sagði Börkur við Fréttablaðið.
Hann segir kostnaðinn við að reka íþróttafélag, mikinn. ,,Valur er að reka sex meistaraflokka í efstu deild sem er gríðarlega kostnaðarsamt og að mínu mati of kostnaðarsamt. Við þurfum að velta hverri krónu vel fyrir okkur áður en við ráðstöfum henni. Það er jafn erfitt fyrir okkur og aðra að ná í nýja samstarfsaðila og við, félögin, þurfum að tala varlega og passa að hræða ekki frá okkur aðila. Við eigum að gera meira og vera faglegri til að laða til okkar sterka samstarfsaðila.“
,,Við erum að reka okkar deild á svipaðan hátt og aðrar stærri knattspyrnudeildir, trúlega eins og flestir aðrir. Við reynum alltaf að vanda okkur, höfum mikinn metnað og höfum náð að skapa umhverfi sem laðar að sterka samstarfsaðila sem við erum mjög stoltir af að vinna með en jafnframt þurfum við að passa okkur á hvernig við spilum úr okkar fjármunum. Við erum alveg jafn blankir og næsti maður.“