Það stefndi allt í að Henrik Larsson, fyrrum landsliðsmaður Svía, myndi taka við Southend á Englandi.
Larsson var mættur á leik hjá Southend á dögunum en liðið leikur í þriðju efstu deild Englands.
Það virtist allt vera klárt fyrir Larsson að taka við en nú er það hins vegar alveg úr sögunni.
Larsson staðfesti það sjálfur í gær en eitthvað hefur farið úrskeiðis í viðræðum við félagið.
Larsson er einn besti leikmaður í sögu Svía en hann hefur áður þjálfað í heimalandinu. Hann hefur þó engan áhuga á að þjálfa þar aftur.