,,Staðan hefur ekkert mikið breyst,“ sagði framherjinn Alfreð Finnbogason þegar hann ræddi við fréttamenn á Laugardalsvelli í dag.
Íslenska liðið er búið að sleikja sárin eftir tap gegn Frakklandi og þarf að vinna Andorra á morgun. Á sama tíma verður Frakkland að vinna Tyrkland, annars er staða Íslands hálf vonlaus.
,,Það var talað um það fyrir síðustu fjóra leikinna að við þyrftum að vinna þrjá. Við þurfum að vinna þrjá leiki og treysta á Frakkana. Það er hægt að finna verri lið en það franska til að treysta á. Við þurfum að klára okkur, við gerum þá kröfu að vinna Andorra og Moldóvu.“
Alfreð byrjaði á bekknum gegn Frakklandi, Kolbeinn Sigþórsson fékk traustið. Þetta er staða sem Alfreð var í lengi, en hann var fyrsti kostur frá 2016 fram til ársins í ár.
,,Já og nei, staðan er öðruvísi núna. Ég er að komast aftur af stað, maður er alltaf ósáttur þegar maður byrjar ekki leiki. Það breytist aldrei, sama hvort ég er að byrja eða ekki þá geri ég mitt besta. Staðan var þannig í þetta verkefni að Erik taldi þetta vera best fyrir liðið. Ég virði þá ákvörðun þó ég sé ekki sammála, þegar ég fæ mín tækifæri þá verð ég klár. Ég vil sanna það eins og síðustu ár þegar ég er heill, þá get ég nýst íslenska landsliðinu.“