Sara Hrund Helgadóttir, hefur verið með höfuðverk daglega í tíu ár. Ástæðan er höfuðhögg sem Sara Hrund fékk í knattspyrnuleik fyrir tíu árum, Sara var ein af þeim sem ræddi alvarleika höfuðhöggs á RÚV í gær.

Sara Hrund hætti í fótbolta árið 2017, hún fékk boltann í hausinn í ágúst árið 2017 og varð að hætta. Það var ekki bara fótboltinn sem Sara þurfti að setja til hliðar, hún var óvinnufær.

„Ég þurfti að hætta í fótbolta og vinnu og skóla. Ég fór algjörlega í veikindaleyfi. Það var mjög erfiður og dökkur tími. Þá bættist í þennan einkennalista, þetta voru ekki bara þessir höfuðverkir. Þá byrjaði ég að fá minnistruflanir, missti jafnvægið, var með daglegan svima. Höfuðverkirnir voru mjög miklir. Og mikið úthaldsleysi, þannig að lífsskilyrðin urðu mjög slæm eftir það höfuðhögg,“ sagði Sara á RÚV í gær en hún lék með Grindavík.

Pressa var á Söru að snúa aftur á völlinn en hún ákvað að láta vita að hún gæti ekki haldið áfram í fótboltanum. „Fólki blöskraði dálítið við það. Fólk var ekkert mikið að tala um höfuðhögg og einkennin. Og ég steig fram því ég fann fyrir pressu um að koma aftur inn á völlinn. Bara strax á dögunum eftir að ég lenti í þessu.“

„Við ætlum okkur að vera svo miklir töffarar, það er ekkert að okkur. En það sér enginn á manni þegar maður er að kljást við afleiðingar þessara höfuðhögga,“ segir Sara Hrund.

Sara ákvað að stíga fram eftir höggið árið 2017 og þá stigu margir fram.

„En um leið og ég steig fram með þetta, þá voru viðbrögðin góð. Samt sem áður var fólk dálítið hrætt hvernig það ætti að nálgast mann og hvað þau ættu að gera. Þannig að maður svona, fór að heyra allt í einu ekki neitt frá klúbbnum og fólkinu í kring. Það var dálítið erfitt.“