,,Hvar eru konurnar?,“ skrifar Hafliði Breiðfjörð, framkvæmdarstjóri Fótbolta.net á Twitter og spyr þar hvers vegna ekki fleiri konur bjóða sig fram til að vera í stjórn Knattspyrnusambands Íslands.
Kosningar í stjórn og varastjórn KSÍ fer fram um aðra helgi, sjö sæti eru í boði en bara ein kona er í framboði. Einnig verður kosið um formann en þar eru Guðni Bergsson núverandi formaður og Geir Þorsteinsson, fyrrum formaður í framboði.
Ragnhildur Skúladóttir situr í stjórn KSÍ en hennar kjörtímabil lýkur ekki fyrr en á næsta ári.
Mikill uppgangur hefur verið í kvennaknattspyrnu á síðustu árum, þeirri uppbyggingu hefur að mestu verið stýrt af körlum innan KSÍ.
Hjá KSÍ sitja átta í stjórn, einnig eru fjórir landsfulltrúar, þá eru þrír varafulltrúar í stjórn sambandsins auk formanns sem kjörinn verður um aðra helgi. Um er því að ræða sextán stöður en aðeins tvær konur sækjast í störfin.
Oftar en ekki hefur hávær hópur kvenna tjáð sig um málefni fótbolta og þá sérstaklega að halli á konur innan hreyfingarinnar. Þessi sami hópur virðist hins vegar ekki hafa áhuga á að mæta á leiki í kvennafótbolta eða reyna að hafa áhrif á hreyfinguna með sæti í stjórn sambandsins.
Borghildur Sigurðardóttir sem setið hefur í stjórn KSÍ í tvö ár sækist eftir endurkjöri.
,,Það verður kosið um 7 sæti í stjórn og varastjórn KSÍ og bara ein kona í framboði. Sem þýðir að konum fækkar úr 3 í 2 í stjórn ef Borghildur nær endurkjör, annars í eina,“ skrifar Hafliði um málið.
Guðrún Inga Sívertsen sem setið hefur í stjórn KSÍ er að láta af störfum og því er ljóst að konum mun fækka sem hafa áhrif innan KSÍ.
,,Af hverju bjóða konur sig ekki fram?,“ skrifar Hafliði sem er eðlileg spurning, til að breyta hlutunum þarf að taka þátt og hafa áhrif.
Hvar eru konurnar? Það verður kosið um 7 sæti í stjórn og varastjórn KSÍ og bara ein kona í framboði. Sem þýðir að konum fækkar úr 3 í 2 í stjórn ef Borghildur nær endurkjör, annars í eina. Afhverju bjóða konur sig ekki fram? https://t.co/ma2Oang9Ts #fotboltinet
— Hafliði Breiðfjörð (@haflidib) January 29, 2019
