Havard Nordtveit sér alls ekki eftir því að hafa samið við lið Arsenal árið 2007 en hann var þar í fjögur ár.

Norðmaðurinn spilaði ekki leik fyrir Arsenal á fjorum árum en samdi síðar við Borussia Monchengladbach og svo West Ham.

Nordtveit spilar með liði Hoffenheim í Þýskalandi í dag en hann er glaður með að hafa tekið skrefið til Englands sem táningur.

,,Að fara til Arsenal var besta ákvörðun sem ég hef tekið. Ég hef aldrei séð eftir því skrefi,“ sagði Nordtveit.

,,Auðvitað var það stórt skref að fara frá FK Haugesund til Arsenal en ég fékk tækifæri á að æfa með bestu leikmönnum heims.“

,,Ég spilaði með varaliðinu en æfði með aðalliðinu og lærði svo mikið. Sem ungur leikmaður var þetta það besta sem gat gerst.“

,,Þegar ég var í hópnum í fyrsta skiptið 18 ára gamall þá pissaði ég næstum í mig á bekknum því ég var svo stressaður.“

,,Við þurftum sigur gegn Sunderland til að komast í Meistaradeildina sem gekk svo upp. Ég var svo glaður í lok dags þó ég hafi ekki spilað.“