Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Hólmar Örn Eyjólfsson, landsliðsmaður Íslands í knattspyrnu hefur átt merkilegan feril þrátt fyrir ungan aldur.

Hólmar var partur af liði West Ham United frá 2008 til 2011 en var lánaður til Cheltenham Town árið 2009.

Það var ansi sérstök upplifun en Cheltenham lék í League 2 sem er fjórða efsta deild Englands.

Það er venjan að menn sparki boltanum bara langt í þeirri deild frekar en að spila boltanum á jörðinni. Hólmar fékk svo sannarlega að kynnast því.

,,Þá skipti ég um íþrótt og fór í League 2. Það var geggjað sko. Ég sé ekki eftir því. Ég bjó með fjórum öðrum gaurum í lítilli íbúð, þá var ég 18 ára og þeir voru allt frá 18 upp í 36,“ sagði Hólmar.

,,Það var mikið fjör og helvíti mikið partý! Eftir hvern leik og það voru tveir leikir í viku. Það var keyrsla sko en það var ógeðslega gaman.“

,,Þar einmitt spilaði ég hægri bakvörð og svona í minningunni var ég minnsti maðurinn á vellinum.“

,,Ég fékk einhvern tímann boltann og renndi honum á miðjuna og hann tók hann bara og lúðraði hann upp í hornið í fyrsta og sagði: ‘Þú gefur ekki boltann á jörðinni, er ekki allt í lagi!?’ Eftir það þá var maður bara að lúðra honum líka.“