Sadio Mane, leikmaður Liverpool, hefur varað liðsfélaga sína við vopni Watford fyrir leik liðanna síðar á tímabilinu.
Liverpool á ekki leik gegn Watford í bráð en með liðinu leikur Ismaila Sarr sem kom frá Rennes í sumar.
Þeir eru samherjar í senegalska landsliðinu og ræddi Mane á meðal annars við bakvörðinn Andy Robertson og varaði hann við.
,,Hann er eldfljótur og ég held að varnarmenn verði í vandræðum með hann,“ sagði Mane.
,,Síðast þá ræddi ég við Robbo og sagði: ‘Watford er með frábæran leikmann. Ég þarf að hjálpa þér því annars þá mun Ismaila Sarr drepa þig því hann er frábær á boltanum og er mjög, mjög fljótur.’
,,Ég er mjög ánægður fyrir hans hönd og hann tók rétta ákvörðun með að semja við Watford. Ég er viss um að hann verði góður.“