Wesley Sneijder, fyrrum leikmaður Inter Milan og Galatasaray, er orðinn virkilega pirraður á sögusögnum um hann og fyrrum konu hans, Yolanthe Cabau.

Yolanthe og Sneijder eru hætt saman en sá síðarnefndi staðfesti það í Instagram færslu í mars.

Á dögunum var svo greint frá því að Sneijder hafi þurft að borga henni 15 milljónir evra í skilnaðinum.

Sneijder segir að það sé algjört kjaftæði og er kominn með nóg af þessum bull sögusögnum um sitt einkalíf.

,,Þetta eru orðrómar sem eru byggðir á hatri, dreift af fávitum og hálfvitar trúa því,“ sagði Sneijder.

,,Ég ætla ekki að vera vinalegur lengur varðandi allt þetta kjaftæði sem fólk er að segja um mig og Yolanthe.“

,,Já við erum ekki saman lengur og það hefur verið þannig í nokkurn tíma. Nei við erum ekki skilin ennþá.“

,,Ég gerði mörg mistök í hjónabandinu en það er ekki ykkar mál. Yolanthe er ennþá svo góð við mig og ég virði það mikið.“

,,Hún sér um strákinn okkar á hverjum degi og hún sér um mig þó að við séum ekki saman lengur. Hún þarf ekki að taka við neinu frá mér því hún á sitt eigið.“

,,Tyrknenskir miðlar segja að hún hafi viljað 19 milljónir og að ég hafi gefið henni 15? Haha, þið verðið klikkaðari með hverjum degi.“