Ólafur Jóhannesson, þjálfari Vals, mætti í viðtal um helgina eftir 1-0 sigur á Grindavík í Pepsi Max-deild karla.

Sigurinn var mikilvægur fyrir Valsmenn en eftir leik þá var Ólafur spurður út í Birni Snæ Ingason sem var ekki í hóp um helgina.

Arnar Daði Arnarsson, blaðamaður Fótbolta.net, spurði Óla þá út í það hvort Birnir væri á leið í ÍBV.

Ólafur svaraði nei og bætti Arnar þá við hvort Birnir væri á förum. Ólafur kaus að svara þeirri spurningu ekki og þagði fyrir framan míkrafóninn.

Þetta viðtal var rætt í hlaðvarpsþættinum Sóknin í gær þar sem Hörður Snævar Jónsson og Hrafn Norðdahl fóru yfir máli.

Hörður segir að Ólafur hafi verið að búa til frétt með þessari hegðun og að það hefði verið auðveldara að bara svara spurningunni.

,,Í staðinn fyrir að búa til einhverja frétt fyrir alla og það sem fólk talar um eftir leik. Arnar spyr hvort Birnir sé að fara til ÍBV og Óli segir nei,“ sagði Hörður sem var við hlið Arnars.

,,Þá spyr Arnar hvort Birnir Snær sé ekki að fara neitt í sumar. Þá bara þagði Óli í staðinn fyrir að segja nei að hann fari ekki neitt. Þá væri það búið.“

,,Arnar ákvað að ganga á hann og spurði held ég þrisvar eða fjórum sinnum þar til Óli sagði að hann færi ekki. Þá var þetta orðið að einhverjum farsa. Það er auðvelt að sparka í liggjandi menn og Valsmenn eru svolítið liggjandi. Þeir eru stórveldi og búnir að dominera titlana hérna heima í fjögur ár. Þá eru fleiri fréttir af þeim gangi illa en að Grindavík sé með tíu stig.“

,,Óli hefði getað stýrt þessu betur með að svara spurningunni en þetta er ekki mál sem skiptir mig sérstaklega miklu máli.“

Hrafn tekur undir þessi ummæli og segir að Valsmenn verði að taka við spurningum og gagnrýni þessa dagana.

,,Þú ert með tvo landsliðsmenn og ert með leikmenn sem myndu byrja í flestum liðum sem eru utan hóps. Það má ræða það og þeir verða að taka því.“