Það eru heldur betur fréttir að berast úr Kópavoginum rétt áður en Pepsi-max deildin fer af stað á föstudag.
Hlaðvarpsþátturinn Dr. Football greindi frá því í kvöld að töluverðar breytingar væru að eiga sér stað í leikmannahópi Breiðabliks.
Kristján Óli Sigurðsson segir að bæði Arnar Sveinn Geirsson og Höskuldur Gunnlaugsson séu á leið til félagsins.
Höskuldur kemur til Blika aftur úr atvinnumennsku og Arnar hefur undanfarin ár leikið með Íslandsmeisturum Vals.
,,Það er allt að gerast. Menn ætla sér titilinn þarna í Kópavoginum, það er klárt,“ sagði Kristján í þættinum sem má nálgast hér.
,,Arnar Sveinn er að fara að krota undir og er kannski búinn að því núna þegar þetta er talað. Hann á að leysa hægri eða vinsti bakvörð.“
,,Svo er stærra og meira dæmi, Höskuldur Gunnlaugsson er að lenda á eyjunni fögru eftir einhverja daga og það er stórt fyrir Pepsi-deildina.“
Stjórnandi þáttarins, Hjörvar Hafliðason ræddi svo belgíska bakvörðinn Jonathan Hendrickx sem er á leiðinni heim samkvæmt hans heimildum.
,,Hendrickx er á leiðinni heim. Þeir eru ekkert að fá Arnar Svein því hann er frábær í klefa. Fáiði Halla og Ladda ef ykkur vantar frábæran gaur í klefann,“ sagði Hjörvar.
,,Hann er að fara heim. Hann er kominn með einhverja heimþrá. Það eru nokkrar vikur síðan ég heyrði þetta.“
,,Hann er bara leiður hérna og það getur gerst á bestu bæjum.“
Kristján var ekki sammála því að Hendrickx væri staðfest á förum en hann er samningsbundinn næstu tvö árin.
Kærasta Hendrickx er sögð vera með heimþrá og gæti Hendrickx þurft að elta hana heim til Belgíu.
,,Hann á kærustu sem er með smá heimþrá og hún getur þá bara farið heim. Það er nóg af konum hérna á Íslandi.“