Louis van Gaal, fyrrum stjóri Manchester United, heldur áfram að tjá sig um sitt fyrrum félag og núverandi stjóra liðsins, Ole Gunnar Solskjær.
Van Gaal tjáði sig í síðasta mánuði þar sem hann sagði að það væri lítill munur á Solskjær og Jose Mourinho.
Hollendingurinn ákvað svo að tjá sig enn frekar í dag og segir að Solskjær sé mikið fyrir það að ‘leggja rútunni’ varnarlega eins og það er kallað.
,,Ég sá að Ole hafði smá áhrif til að byrja með því United var í 9. sæti deildarinnar og það var ekkert að gerast,“ sagði Van Gaal.
,,Þeir voru ekki að spila fótbolta en ekki halda það að Ole sé hræddur við það að leggja rútunni – hann er varnarsinnaðari en þið haldið.“
,,Ég hef horft á liðið því ég fylgist alltaf með United og Ole lagði rútunni gegn Arsenal.“
,,Hann gerði það gegn Tottenham og svo á köflum gegn Paris Saint-Germain og Barcelona í Meistaradeildinni.“
,,Hann spilar svona gegn öllum stórliðunum. Hann einbeitir sér meira að því að verjast en að sækja, að stjórna leikjum.“
,,Ég kalla það að leggja rútunni. Hann leggur rútunni fyrir framan markmanninn.“
