Victor Lindelof, leikmaður Manchester United, er ekki með sænska landsliðinu í undankeppni EM þessa stundina en hann sinnir eiginkonu sinni.
Lindelof hafnaði kalli sænska landsliðsins fyrr í mánuðinum fyrir leiki gegn Rúmeníu og Noregi í keppninni.
Ástæðan er sú að eiginkona Lindelof á von á barni í byrjun apríl og vill varnarmaðurinn vera til staðar fyrir hana.
Eftir þessa ákvörðun hefur Lindelof fengið ógeðsleg skilaboð sem lögreglan rannsakar nú. Ákvörðunin fór illa í nokkra stuðningsmenn sænska liðsins.
Aftonbladet segir að sænska knattspyrnusambandið hafi þurft að hafa samband við lögreglu eftir skilaboð sem Lindelof fékk á samskiptamiðlum.
Lögreglan hefur staðfest að verið sé að rannsaka hótanirnar og mun fara nánar í málið eftir leik við Noreg á morgun.
Svíar unnu fyrri leik sinn á dögunum gegn Rúmeníu 2-1 og var Lindelof ekki með í sigrinum.