Manchester United er úr leik í enska bikarnum eftir leik við Wolves á útivelli um helgina. Lið United tapaði þar öðrum leiknum í röð undir stjórn Ole Gunnar Solskjær.
Um var að ræða leik í 8-liða úrslitum keppninnar en Wolves hafði betur með tveimur mörkum gegn einu.
Solskjær var óhress eftir leik enda var þetta besti möguleiki hans á að vinna titil á þessu tímabili, nú er aðeins Meistaradeildin sem er í boði. Þar mætir liðið Barcelona í átta liða úrslitum, verkefnið er því erfitt.
Ensk blöð fjalla um það í dag að Solskjær hafi lesið hressilega yfir leikmönnum United eftir tapið. Hann hafi sakað þá um að hverfa aftur til fortíðar.
Solskjær vildi meina að frammistaðan hafi verið í anda Jose Mourinho, en hann var rekinn frá United í desember og Solskjær tók við.
