Valur mun síðar í dag greina frá komu þriggja nýrra leikmanna til félagsins. Þar á meðal er Gary Martin framherjinn knái.
Gary Martin hefur spilað með Lilleström í Noregi síðasta árið en hann er væntanlegur til landsins síðar í dag og verður þá kynntur til leiks.
Gary átti góðu gengi að fagna á Íslandi þegar hann lék með ÍA, KR og Víkingi en hann hefur undanfarið verið í atvinnumennsku, hjá Lilleström og Lokeren.
Samkvæmt heimildum 433.is mun Valur einnig kynna til leiks Emil Lyng sem áður hefur leikið hér á landi, Lyng lék með KA sumarið 2017.
Lyng er sóknarsinnaður leikmaður sem getur leyst allar fremstu stöðurnar, hann skoraði níu mörk í 20 leikjum fyrir KA.
Lyng er 29 ára gamall danskur leikmaður, hann lék síðast með Haladás í Ungverjalandi.
