Kristján Guðmundsson, þjálfari ÍBV, var súr í leikslok í kvöld eftir 5-1 tap liðsins gegn Íslandsmeisturum Vals.
ÍBV var með 1-0 forystu eftir fyrri hálfleikinn en liðið brotnaði í þeim síðari og fékk á sig fimm mörk.
,,Ég er ánægður með fyrri hálfleikinn, við spiluðum akkúrat eins og við vildum og við nálgumst Val öðruvísi en áður. Við héldum boltanum, pressuðum á þá og skoruðum fallegt mark,“ sagði Kristján við Stöð 2 Sport.
,,Þeir settu í gírinn í seinni hálfleik og við náðum ekki að stoppa þá. Eftir 1-1 markið gáfust menn bara upp og hættu að trúa því að það væri hægt að vinna.“
Kristján ræddi svo um atvik sem kom upp í leiknum er hann virtist öskra á fyrirliða sinn, Sindra Snæ Magnússon eftir að hann var tekinn af velli.
,,Við verðum að fá að tjá tilfinningar okkar. Það voru hlutir sem ég taldi að hann hefði getað gert betur eða á annan hátt. Við getum ekki sætt okkur við þessa frammistöðu. Ég og fyrirliðinn verðum að geta tjáð okkur.“