Knattspyrnusamband Íslands leitar nú að nýjum landsliðsþjálfara eftir að HEimnir Hallgrímsson yfirgaf stöðuna í síðasta mánuði.

Heimir náði frábærum árangri með landsliðið en hann vann lengi undir stjórn Lars Lagerback áður en hann tók við sjálfur eftir EM 2016.

Guðni Bergsson, formaður KSÍ, staðfesti það í samtali við Fréttablaðið í dag að viðræður við Erik Hamren hafi átt sér stað um að taka við liðinu.

Hamren er sænskur líkt og Lagerback en hann var síðast landsliðsþjálfari Svía frá 2009 til 2016.

„Við höfum rætt við Erik Hamrén. Við höfum ekki bara rætt við hann heldur fleiri,“ sagði Guðni við Fréttablaðið.

Hamren er 61 árs gamall í dag og hefur einnig þjálfað félagslið á borð við AIK, AaB og Rosenborg.