Livingston í skosku úrvalsdeildinni hefur ákveðið að reka þjálfara sinn, Kenny Miller sem entist aðeins sjö vikur í starfi.
Ástæðan er ansi einkennileg en Miller stýrði Livingston í sjö leikjum þar sem liðið vann þrjá og gerði tvö jafntefli.
Miller hefur bæði spilað fyrir Livingston og þjálfað liðið en stjórn félagsins bað hann vinsamlegast um að leggja skóna á hilluna til að sinna þjálfarastarfinu að fullu.
Miller neitar hins vegar að hætta að spila en hann skoraði alls eitt mark í sjö leikjum fyrir liðið í öllum keppnum.
Miller er 38 ára gamall framherji en hann á að baki 69 landsleiki fyrir Skotland og spilaði fyrir mörg góð lið á ferlinum.
Skotinn var duglegur að skora fyrir lið á borð við Wolves og Rangers á ferlinum en hann lék með Rangers frá 2014-2018. Hann samdi við Livingston fyrr á árinu.