Margrét Björg Ástvaldsdóttir, félagsfræðingur og knattspyrnukona segir misrétti á milli karla og kvenna gríðarlegt í knattspyrnuheiminum hér á landi. Í Morgunblaðinu í dag er fjallað um rannsókn sem hún vann. Setti hún fókus á æfingatíma, klefamál, aðgengi að sjúkraþjálfara og hvort liðið væri með liðstjóra. Niðurstöðurnar eru sláandi. Í ljós kom að mismunað er í öllum tilfellum en einnig var skoðað þema þar sem leikmenn leiða börn inn á völl, æfingafatnað, þvott, fjáraflanir og upplifun fyrirliða.
„Mest mismunun kom fram í klefamálum. Í fimm af tíu tilfellum voru karlarnir með stærri klefa en konur. Þeir eru einnig í miklu meira mæli með sérklefa, bara fyrir sig, en kvennaliðin deila þeim oftar með öðrum,“ segir Margrét í samtali við Morgunblaðið.
Einn fyrirliði greindi frá að kvennalið í einu félagi hafði einn liðsstjóra en karlaliðið tvo. Þá þurfti fyrirliði eins liðs að úthluta æfingabúnaði, panta þá og láta leikmenn fá númer og æfingaföt.
Niðurstöður rannsóknarinnar voru eftirfarandi en nánar er fjallað um málið í Morgunblaðinu.
„40% kvennaliðanna þurftu að vinna á leikjum karlaliðsins í sama félagi en ekkert karlaliðanna þurfti að vinna á leikjum kvennaliðsins. 30% kvennaliðanna voru með klefa sem aðrir notuðu líka en 10% karlaliðanna. 20% kvennaliðanna fengu ekki sjúkraþjálfara aukalega á æfingar en öll karlaliðin fengu sjúkraþjálfara aukalega.“