Varnarmaðurinn öflugi Ragnar Sigurðsson hefur skrifað undir nýjan samning við Rostov í Rússlandi.

Þetta staðfesti rússnenska félagið í dag en samningur Ragnars við liðið rann út í sumar.

Ragnar skrifaði undir nýjan tveggja ára samning í dag og mun halda ferli sínum áfram í Rússlandi.

Ragnar var fenginn til Rostov í janúar á þessu ári en hann kom til félagsins frá Fulham á Englandi.

Fyrir það hafði varnarmaðurinn spilað með Rubin Kazan í láni og var þá áður hjá Krasnodar sem spilar einnig í Rússlandi.

Ragnar er 32 ára gamall í dag en hann tilkynnti það eftir HM í sumar að hann væri hættur að spila með íslenska landsliðinu.