Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er markahrókurinn Viðar Örn Kjartansson sem spilar með Rostov í Rússlandi.
Viðar hefur átt ansi litríkan feril en hann hefur spilað í Skandinavíu, Ísrael og líka í Kína sem var áhugavert skref.
Viðar er 28 ára gamall framherji en hann á að baki 19 landsleiki fyrir Ísland.
Viðar fékk ekki að fara með landsliðinu á EM árið 2016 er hann lék með Malmö í Svíþjóð.
Viðar hafði fengið að spila í undankeppninni en fékk svo ekki pláss í lokahópnum sem var óvænt.
Hann viðurkennir að hann hafi búist við kallinu og var það mikill skellur er hann heyrði fréttirnar.
,,Það kemur smá stress í mann þegar það er verið að fara að velja en þegar maður hugsar um tölfræðina, þú ert alltaf í hópnum og nýbúinn að komast í gang með Malmö,“ sagði Viðar.
,,Ég var smeykur að ef ég hefði ekki komist í gang þá hefði ég skilið það því ég gat ekkert í sjö eða átta leikjum. Ég var samt frekar viss um að ég yrði valinn, útaf öllum þessum hópum.“
,,Svo er ég ekki valinn og það var rosalega vont. Ég get eiginlega ekki lýst þessu. Ég hugsaði ‘ég get bara ekki neitt’ og fór lengst niður.“
,,Það var erfitt að fylgjast með EM. Mig langaði að vera þarna vel og svo gekk þeim extra vel og það gerir það erfiðara.“
,,Segjum að þeir hefðu ekki komist úr riðlinum, auðvitað vill maður vera með en að ganga svona vel þá langar manni að vera með strákunum á vellinum.“