Arnór Sigurðsson, 19 ára knattspyrnumaður hefur orðið að stjörnu á nokkrum mánuðuðum. Flestir sem fylgjast vel með knattspyrnu vissu lítið sem ekkert um Arnór í sumar. Arnór var þá að gera það gott með Norrköping í Svíþjóð en fáir fylgdust með framgöngu hans.
Strákurinn af Skaganum hefur orðið að stjörnu á einni nótt, ef þannig má komast að orði. Sagan náði hátindi sínum á miðvikudag þegar Arnór skoraði og lagði upp mark á einu sögufrægasta sviði fótboltans, Santiago Bernabeu í Madríd.
,,Ævintýrið ætlar engan enda að taka hjá Skagamanninum Arnóri Sigurðssyni en þessi 19 ára sóknarmaður
heldur áfram að slá í gegn á fótboltavellinum. Á nokkrum mánuðum hefur hann spilað sína fyrstu leiki í Meistaradeild Evrópu og ekki nóg með það heldur hefur hann skorað á móti Roma og sjálfum Evrópumeisturum Real Madrid á Santiago Bernabeu, fyrstur Íslendinga,“ skrifar Guðmundur Hilmarsson, einn virtasti íþróttablaðamaður Íslands um Arnór í Morgunblaðinu í dag.
,,Ég verð að viðurkenna að ég var svolítið hissa þegar rússneska stórliðið keypti Arnór frá sænska liðinu Norrköping í sumar fyrir upphæð sem jafngildir um hálfum milljarði króna. Ég þekkti lítið til stráksins og vissi hreinlega ekki hversu góður hann var.“
,,En Rússarnir nældu sér í gullmola og með frammistöðu sinni á síðustu vikum og mánuðum hefur Skagastrákurinn margfaldast í verði og verður eflaust eftirsóttur af sterkari liðum en CSKA Moskva.“
,,Það var stoltur pabbi sem ég ræddi við aðeins nokkrum mínútum eftir leik CSKA og Real Madrid en hann ásamt móður Arnórs og stórfjölskyldu var á vellinum og upplifðu þau þar ógleymanlega stund.“