Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Gestur þáttarins í þessari viku er Tryggvi Guðmundsson, fimmfaldur Íslandsmeistari og markahæsti leikmaður í sögu efstu deildar á Íslandi. Tryggvi átti magnaðan feril, hann var óþolandi leikmaður að mæta. Skoraði mikið og vann titla.
Ólafur Jóhannesson er á toppnum yfir þjálfara á Íslandi í dag en hann stýrir Valsmönnum í Pepsi-deildinni.
Valur er með besta lið landsins og hefur verið með í tvö ár en liðið er nú tvöfaldur Íslandsmeistari.
Tryggvi vann með Óla Jó hjá FH á sínum tíma og fer fögrum orðum um sinn fyrrum þjálfara.
,,Það var æðislegt að spila fyrir hann. Hann er ekki að flækja hlutina, hann er snillingur og veit um hvað þetta snýst,“ sagði Tryggvi.
,,Hann er líka á léttu á nótunum og fattar það að þetta er ekki dauðans alvara. Þetta er samt mikilvægt mál en hann fattar svona muninn á þessu einhvern veginn.“
,,Svo er hann klókur í að finna leikmenn. Það er hægt að sjá það með Valsliðið núna, hann veit hvar hann á að styrkja sig.“
,,Það var hann sem fékk mig og Auðun á sínum tíma, hann klókur maður og það er ógeðslega gott að vinna með honum.“