Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Gestur þáttarins í þessari viku er Tryggvi Guðmundsson, fimmfaldur Íslandsmeistari og markahæsti leikmaður í sögu efstu deildar á Íslandi. Tryggvi átti magnaðan feril, hann var óþolandi leikmaður að mæta. Skoraði mikið og vann titla.
Tryggvi lék með mörgum liðum á sínum ferli og þar á meðal KR en hann stoppaði í eitt ár hjá félaginu árið 1994.
Tryggvi hafði fyrir það verið duglegur að skora með ÍBV en fékk einn daginn símtal frá Guðjóni Þórðarsyni sem var tekinn við KR.
Tryggvi segir að það hafi ekki komið til greina að neita því boði en hann var þó í smá erfiðleikum til að byrja með í Frostaskjólinu.
,,Heitasti þjálfari landsins á þeim tíma, Guðjón Þórðarson, hringdi í mig og sagði að ég væri spennandi leikmaður sem hann vildi fá að njóta,“ sagði Tryggvi.
,,Einhver gutti í Vestmanneyjum að fá símtal frá Guðjóni Þórðarsyni sem hafði gert góða hluti með ÍA og tekur við KR, þú segir bara já.“
,,Þetta var svolítið erfitt því þetta voru bara 18 leikir og ég byrja í þriggja leikja banni.“
,,Ég hafði tímabilið áður spilað með 2. flokk og meistaraflokki og var með samansafnaða punkta. Ég fékk rautt spjald í lokaleik hjá 2.flokki sem þýðir að ég gat bara spilað 15 leiki max.“
,,Þetta var samt gaman og sérstaklega gaman því KR hafði ekki unnið titil í 27 ár og við urðum bikarmeistarar þetta árið. Gjörið svo vel KR!“
,,Ég fór bara einn í bæinn, ég átti kærustu á þeim tíma sem bjó í bænum en þetta voru viðbrigði. Ég þurfti ekki strætómiða, ég bjó á Hringbrautinni og vann á háskólalóðinni og spilaði í Vesturbænum, fínn hringur.“