Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ristjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er Guðni Bergsson formaður KSÍ sem mun í febrúar reyna að endurnýja umboð sitt í starfi.

Jón Þór Hauksson var fyrr á árinu ráðinn nýr þjálfari A-landsliðs kvenna og tekur við keflinu af Frey Alexanderssyni.

Sú ráðning vakti töluverða athygli en Jón Þór er að taka við kvennaliði í fyrsta sinn. Hann mun starfa með Ian Jeffs sem hefur þó töluverða reynslu af því að þjálfa konur.

Guðni er spenntur fyrir komandi tímun undir stjórn tvímenningana og er viss um að ráðningin muni borga sig.

,,Við í raun og veru eins og með karlalandsliðið höfum unnið eftir einhverjum reglum varðandi ráðninguna,“ sagði Guðni.

,,Við vorum með ákveðinn lista og veltum fyrir okkur ákveðnum kandídötum. Jón Þór var á þeim lista.“

,,Hann hafði vakið athygli sem góður aðstoðarþjálfari hjá Skagamönnum og vann gríðarlega gott starf upp á Skaga í mörg ár.“

,,Svo tók hann stuttlega við meistaraflokki og náði fínum árangri eftir að þeir voru nánast fallnir. Svo fór hann til Stjörnunnar og við vissum og heyrðum að það væri mikil ánægja með hann þar.“

,,Þannig að þegar við vorum búnir að fara yfir og ræða við nokkra á þessum lista og velta fyrir okkur möguleikum og hverjir væru tilbúnir, þá ræddum við við Jón Þór um að koma inn sem landsliðsþjálfari.“

,,Við vorum meðvituð um það að hann er ekki með bakgrunn sem kvennaþjálfari en þetta er fótbolti, fótbolti er fótbolti og auðvitað er munur á kvennabolta og karlabolta.“

,,Við töldum að með góðum aðstoðarmanni í Ian Jeffs sem hefur mikla reynslu úr þjálfun í kvennabolta þá værum við að fá spennandi blöndu af þjálfara, metnaðarfullra ungra þjálfara sem myndi virka vel á þennan hóp.“

,,Ég sé þetta líka í stærra samhengi, að horfa niður í uppbyggingu kvennaboltanns, horfa hvað við erum að gera í þjálfun niður í yngri flokka.“

,,Ég hef áhyggjur af því og hef aflað mér upplýsingar um það að kannski eru gæðin í yngstu kvennaflokkunum okkar ekki eins mikil og karla megin.“

,,Það virðist eins og þjálfarar leiti meira í karlaboltann og það er eitthvað sem við þurfum að rýna í og athuga.“

,,Svo líka í annan stað finnum við fyrir mikilli uppsveiflu í kvennaboltanum í heiminum og við þurfum að vera á varðbergi með það hvernig við getum mest bætt okkur þannig ég tel þetta þjálfarateymi vera vel í stakk búið til þess að ekki bara sinna A-landsliðinu heldur koma að uppbyggingu 21 árs landsliði kvenna og svo kvennaboltann í heild sinni.“

,,Ég held að þetta sé spennandi teymi sem við erum komin með og mér líst vel á þá. Þeir voru með æfingahelgi nýverið og ég er bjartsýnn á að þeir geti gert góða hluti með A-landslið kvenna.“