Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ristjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er Hörður Magnússon knattspyrnulýsandi og fyrrum landsliðsmaður í knattspyrnu.

Pepsi-mörkin og Hörður komust í fréttirnar árið 2011 er fjallað var um Íslandsmeistara KR.

Þar var gerð svokölluð ‘dómarasyrpa’ þar sem mátti sjá mistök dómara í leikjum KR um sumarið.

Eftir það varð allt vitlaust og fengu Hörður og félagar mikið skítkast í kjölfar þessarar umfjöllunar.

,,2011 er fyrsta árið mitt sem stjórnandi Pepsi-markanna. Við höfðum róterað árin áður,“ sagði Hörður.

,,Þessi dómarasyrpa, það voru rangar ákvarðanir sem hjálpuðu KR að vinna leiki eða ná í jafntefli. Það safnaðist upp.“

,,Hjörvar Hafliðason, hann var búinn að liggja í mér með þetta. Það var hann sem kom með þetta fyrst. Ég sagði ‘nei Hjörvar, nú skulum við að eins róa okkur.’

,,Svo bætist við einn leikur og annar og ég sagði ‘ókei, við gerum þetta.’ Það verður allt vitlaust.“

,,RÚV var líka með þátt á sama tíma. Þeir voru í opinni dagskrá en við í læstri sem var mjög öfugsnúið því við áttum þennan bolta.“

,,Við fórum út í þetta, hvorki fyrr eða síðar hafa verið jafn mikil læti. Vesturbærinn kom á okkur eins og flóðbylgja.“

,,Þetta var í nokkrar vikur og svo neituðu þeir að tala við fjölmiðlana okkar, ég sé þetta ekki gerast í dag.“

Kjartan Henry Finnbogason átti frábært tímabil með KR þetta sumar en var ekki talinn fá rétta umfjöllun í þættinum.

,,Með Kjartan Henry, við völdum hann besta leikmanninn árið 2011. Við vorum miklir aðdáendur.“

,,Ég man eftir einu, ég hugsaði með mér ‘nei við sleppum þessu’. Það var olnbogaskot, meint olnbogaskot og traðk á Selfossi. Cameran var langt í burtu og ég sagði ‘við sleppum þessu.’

,,Mér gekk vel gegn KR sem leikmanni og var áberandi á vellinum. KR-ingarnir fóru að segja ‘Höddi hatar KR’ og allt þetta, margir af mínum bestu vinum eru KR-ingar.“

,,KR er það félag sem hefur verið mest talað um í fótboltanum. Þetta sem við gerðum var kannski yfir strikið af einhverju leiti en samt ekki því þetta var spot on.“

,,Svo spiluðum við það sem enginn tók eftir. Hjörvar vildi fá lagið úr Guðföðurinum undir syrpuna, eins og þetta væri KR mafían.“

,,Ég sagði að allir myndu þekkja þetta lag og sagði að við gætum tekið Sopranos! Það þekkja það færri. Þetta var svona á mörkunum hjá okkur.“

Umræðan hefst eftir 43 mínútur í spilaranum hér fyrir neðan.