Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er Hörður Magnússon knattspyrnulýsandi og fyrrum landsliðsmaður í knattspyrnu.

Hörður var aldrei valinn í landsliðið af Bo Johansson á sínum tíma sem var þjálfari Íslands frá 1990 til 1991.

Bo var ekki mikill aðdáandi Harðar eftir atvik sem kom upp eftir leik við Bermúda en landsliðsnefnd hafði sett saman hópinn fyrir þessa ferð.

Ísland vann þann leik örugglega og eftir leikinn þá var haldið partý á leikmannahótelinu.

Því miður fyrir Hörð þá var það partý haldið í hans herbergi og fékk hann alla sökina á sig ásamt þáverandi herbergisfélaga sínum.

,,Í fyrsta sinn er ég valinn í landsliðið um haustið og það var rosalegur heiður þegar Ásgeir Elíasson heitinn tekur við,“ sagði Hörður.

,,Þrátt fyrir þessa þrjá markakóngs titla þá valdi Bo Johansson mig aldrei í landsliðið.“

,,Það pirraði mig aðeins en ég ætla að segja þessa sögu. Við förum til Bermúda og Bandaríkjanna sem eru fyrstu verkefni Bo Johanssonar.“

,,Við spilum við Bermúda og ég kem inná þar og fiska víti og við vinnum 4-1. Það er gleðskapur eftir leikinn, við vorum á geggjuðu hóteli, 20 metrar í sjóinn.“

,,Það gerist það að það koma allir í herbergið sem ég og annar landsliðsmaður erum í og það er partý, mikið og gott partý.“

,,Menn voru ekki að brjóta neinar reglur, þetta var allt í lagi. Svo fer ég að hafa smá áhyggjur því menn voru búnir að sitja þarna ansi lengi og þetta er orðið bara fínt.“

,,Svo á endanum lýkur gleðskapnum og svo vakna ég um morguninn nokkuð snemma og sé að það er allt í rúst og ég byrja að taka til.“

,,Það var þannig að Bo Johansson var í næsta eða þar næsta herbergi við mig og af einhverjum ástæðum var hurðin opin.“

,,Ég er að taka einhverjar kampavínsflöskur og er bara að ganga frá þessu. Ég held svona á einhverjum flöskum til að henda og hann kemur í dyragættina og segir við mig þessa setningu: ‘Hörður, enough is enough.’

,,Svo spiluðum við gegn Bandaríkjamönnum og ég hafði staðið mig vel og bjóst við að koma inná. Ég og þessi hinn landsliðsmaður sem var með mér í herbergi vorum þeir einu sem komu ekkert við sögu. Við töpum 4-0.“

,,Ég var ‘happy go lucky’, við vorum í landsliðinu í fyrsta skiptið og voða gaman en svo gerist það að hann velur mig aldrei.“

,,Ég velti því eitthvað fyrir mér en það voru aðrir sem höfðu kannski meiri áhyggjur af því af hverju ég var ekki valinn, það var auðvitað rosaleg samkeppni, við áttum frábæra sóknarmenn.“

,,Það er svo mörgum árum seinna, löngu eftir að Bo Johansson er hættur. Þá kemur maður að máli við mig og segir að þetta hafi verið ástæðan.“

,,Ég hugsaði bara ‘í alvöru? ha?’ Hann talaði aldrei við mig, ég var einn af fáum sem reyndi að halda haus þarna. Mér finnst þetta nokkuð góð skýring. Það hefði verið skemmtilegt hefði hann spjallað við mig um þetta atvik.“

Meira:
Einelti í garð Harðar fékk að ganga í mörg ár: Sonur Bjössa Bollu og Höddi Skinka – ,,Yrði kæft í fæðingu í dag“
Sopranos og KR mafían – ,,Vesturbærinn kom á okkur eins og flóðbylgja“
Höddi Magg svarar Benedikt Bóasi: Ósanngjörn, illa ígrunduð og algjörlega út úr kú