Sir Alex Ferguson, fyrrum stjóri Manchester United, reyndi ítrekað að fá leikmanninn Joe Cole frá West Ham á sínum tíma.
Þetta segir Harry Redknapp, fyrrum stjóri West Ham en Cole var gríðarlegt efni er hann var yngri.
Cole gaf það út í dag að hann væri hættur, 37 ára gamall en hann spilaði síðast með Tampa Bay Rowdies í Bandaríkjunum.
Cole átti farsælan feril og spilaði með liðum á borð við Chelsea og Liverpool á ferlinum eftir dvöl hjá West Ham.
,,Sir Alex Ferguson sendi honum treyju Manchester United með ‘COLE 10’ skrifað aftan á,“ sagði Redknapp.
,,Þetta er það sem þú færð þegar þú spilar fyrir Manchester United, sagði í skilaboðunum. Alex vildi mikið fá hann.“
,,Hann bauð honum meira að segja að ferðast með liðinu í liðsrútunni á leið í úrslitaleik bikarsins.“
,,Arsenal vildi fá hann, Chelsea vildi fá hann en ég vissi að Joe yrði ánægðastur hjá West Ham svo ég gaf honum pláss.“
,,Ég hefði getað orðið pirraður og sagt að hann væri búinn að skrifa undir hjá okkur og hótað United en hvað hefði það gert?“