Andri Rúnar Bjarnason hefur verið kallaður í íslenska landsliðshópinn fyrir komandi verkefni.
Þetta staðfesti KSÍ nú rétt í þessu en Andri tekur stöðu Jóhanns Berg Guðmundssonar sem er meiddur.
Jói Berg fór meiddur af velli hjá Burnley í gær er liðið gerði markalaust jafntefli við Leicester City.
Andri hefur verið frábær fyrir lið Helsingborg á árinu og skoraði 16 deildarmörk er liðið tryggði sér sæti í efstu deild.
Andri er 27 ára gamall framherji en hann á að baki tvo landsleiki og hefur skorað í þeim eitt mark.
Ísland á leiki við Belgíu og Katar í þessum mánuði en leikurinn við Belga er keppnisleikur í Þjóðadeildinni.