Það vakti nokkra athygli þegar Viðar Örn Kjartansson greindi frá því árla morguns á laugardag að hann væri hættur í landsliðinu.
Ákvörðunin kom á óvart enda Viðar aðeins 28 ára gamall og á nóg eftir. Tækifæri hans með landsliðinu hafa ekki verið eins mörg og hann hafði vonast eftir.
Viðar segir við Fótbolta.net að hann hafi verið mikið verkjaður síðustu mánuði og hafi í raun spilað meiddur í heilt ár.
Hann útilokar því ekki að snúa aftur í landsliðið innan tíðar, þegar meiðslin hafa jafnað sig.
,,Þetta er tímabundin ákvörðun sem ég held að muni koma mér vel. Ég átti gott spjall við Freysa og við vorum sammála um að þetta myndi gera mér gott að komast á skrið hér. Á meðan þá vona ég að landsliðinu gangi sem allra best og er ekki i vafa um að þeir komast á skrið aftur sem fyrst,“ segir Viðar við Fótbolta.net.
„Svo þegar ég er kominn á fullt þa veit maður aldrei hvað gerist. Það er ekki buið að loka neinum dyrum og þetta er allt gert í mesta bróðerni.“