Ísland tapaði 2-1 fyrir Sviss í Þjóðadeildinni í kvöld en liðin áttust við á Laugardalsvelli.
Ísland hefur oft spilað betur en í kvöld en fyrstu 80 mínúturnar voru mjög slakar hjá okkar mönnum.
Eftir mark Alfreðs Finnbogasonar tók Ísland þó við sér og sýndi klærnar síðustu tíu mínútur leiksins.
Tap þó staðreynd í Laugardalnum og er Ísland fallið úr A deild.
Hér má sjá það góða og slæma úr leiknum.
Plús:
Það er erfitt að tala um eitthvað jákvætt við þennan leik. Við fengum ekki á okkur sex mörk eins og í síðustu viðureign sem er ánægjulegt.
Þjóðin stóð við bakið á strákunum á Laugardalsvelli og lét vel í sér heyra þrátt fyrir gríðarlegan kulda.
Alfreð Finnbogason skoraði stórkostlegt mark í leiknum. Ákvað að taka þrumuna fyrir utan teig og það skilaði sér.
Við tókum svo sannarlega við okkur eftir mark Alfreðs. Hvar var þetta lið fyrstu 80 mínúturnar? Vorum gríðarlega nálægt því að jafna.
Mínus:
Það er búið að byggja upp ákveðinn ‘standard’ í þessu landsliði og var frammistaða kvöldsins langt fyrir neðan hann.
Vinstri vængurinn var heilt yfir slakur í leiknum. Þeir Arnór Ingvi Traustason og Hörður Björgvin Magnússon náðu ekki vel saman.
Það er mikið áhyggjuefni að Sviss var svo langt frá því að spila sinn besta leik í kvöld. Unnu samt nokkuð sannfærandi að lokum þrátt fyrir góðar lokamínútur Íslands.
Ísland er yfirleitt minna með boltann en við sköpum nánast alltaf færi. Við fengum nánast engin færi til að skora í þessum leik þar til í blálokin.
Það er erfitt að segja til nákvæmlega hvað er að klikka. Liðið er einfaldlega skugginn af sjálfu sér þessa dagana.
Ísland er fallið úr A deild eftir tapið í kvöld. Við erum á leið í B deildina og það nokkuð verðskuldað.