Zlatan Ibrahimovic, leikmaður LA Galaxy, styður við bakið á fyrrum stjóra sínum hjá Inter Milan og Manchester United, Jose Mourinho.

Mourinho er talinn vera valtur í sessi á Old Trafford þessa dagana og gæti haft takmarkaðan tíma til að snúa gengi liðsins við.

Zlatan hefur lofsungið Portúgalann margoft á ferlinum og er viss um að hann sé ennþá með það sem til þarf svo United komist aftur á beinu brautina.

,,Af hverju er Mourinho svona sérstakur? Í fyrsta lagi því hann er sigurvegari og er með sigurviðhorf. Hann gerir allt til að vinna,“ sagði Zlatan.

,,Hann þekkir leikinn eins og lófann á sér og er meistari í að lesa leikinn. Hann stjórnar á duldan hátt, ekki leiknum sjálfum, heldur tekst honum að toga í strengi og stýra huga leikmanna sinna á þennan dulda hátt.“

,Það gerir hann mjög sérstakan að mínu mati því þegar hann kom á stóra sviðið þá var hann öðruvísi.“

,,Hann var ekki þessi týpíski þjálfari. Ég man eftir Fabio Capello. Capello var harður í horn að taka og vildi virðingu. Mourinho kom með það sama en einnig karakter. Hann var öðruvísi karakter, hvernig hann tjáir sig.“