Forseti franska knattspyrnusambandsins, Noel De Graet telur að Karim Benzema muni aldrei leika aftur fyrir franska landsliðið.

Benzema hefur ekkert spilað fyrir þjóð sína undanfarin þrjú ár eftir atvik sem kom upp árið 2015 sem tengist þáverandi liðsfélaga hans, Mathias Valbuena.

Benzema var þá ásakaður um að hafa kúgað fé út úr liðsfélaga sínum, Valbuena og er það mál enn í vinnslu samkvæmt De Graet.

,,Valbuena-Benzema málið tók sig upp á ný í síðustu viku og þetta er ekki búið,“ sagði Le Graet.

,,Það eru liðin þrjú eða fjögur ár. Þetta hefði átt að vera búið fyrir löngu.“

,,Ég hef ekkert á móti Karim, hann hefur alltaf hagað sér vel í landsliðinu en ég held að ferill hans þar sé búinn sérstaklega því hann hefur ekki verið að spila vel í dágóðan tíma.“

Karim Djaziri, fyrrum umboðsmaður Benzema, er kominn með nóg af því hvernig sambandið kemur fram við leikmanninn.

Djaziri svaraði De Graet fullum hálsi í kjölfarið og segir honum að leyfa Benzema að spila fyrir annað landslið.

,,Noel, þú varst búinn að enda feril Karim í júní árið 2018 og nú ertu að gera það aftur og móðgar hann á sama tíma,“ sagði Djaziri.

,,Hvað er planið? Ertu með samviskubit yfir einhverju? Skrifaðu bréf til FIFA og leyfðu honum að spila fyrir annað landslið og sjáum hvort hann sé ‘búinn’.