Martin O’Neill, stjóri írska landsliðsins, hefur svarað Alan Shearer, sérfræðingi BBC eftir ummæli sem hann lét falla á dögunum.

Shearer gagnrýndi Cyrus Christie, leikmann Fulham, eftir 5-1 tap liðsins gegn Arsenal um helgina.

Christie leikur með írska landsliðinu undir stjórn O’Neill og var Shearer alls ekki hrifinn af bakverðinum í leiknum.

,,Arsenal tók eftir veikleikum Fulham sem var hægra megin og þá serstaklega Christie. Þeir yfirspiluðu þá þarna,“ sagði Shearer.

,,Christie var alltaf að reyna að sækja og hafði engar áhyggjur af því að verjast. Hann var labbandi. Liðið hans var í vandræðum.“

O’Neill svaraði Shearer í kjölfarið og ræddi um tíma hans hjá Newcastle tímabilið 2008/2009.

Shearer tók þá við liði Newcastle síðustu tvo mánuði tímabilsins en mistókst að bjarga liðinu frá falli.

,,Kannski er þetta ástæðan fyrir því að hann entist í aðeins sjö leiki, þetta gæti tengst því,“ sagði O’Neill.