Gylfi Þór Sigurðsson, besti knattspyrnumaður Íslands sér eftir þvi að hafa ekki mætt í viðtöl eftir síðasta landsleik.
Gylfi fékk nokkuð harða gagnrýni fyrir að mæta ekki í viðtöl eftir tap gegn Belgíu á heimavelli í síðasta mánuði. Gylfi var fyriliði liðsins í leiknum en gaf ekki kost á sér í viðtöl.
,,Maður tekur ekki allar réttar ákvarðanir,“ sagði Gylfi á fréttamannafundi í Frakklandi í dag sem sýndur var í beinni á Vísir .is.
Ísland mætir Frakklandi í æfingaleik á morgun. ,,Eftir 6-0 tap gegn Sviss og svo 3-0 tap gegn Belgíu, þá er maður andlega ekki að taka réttar ákvarðanir. Maður hefði farið í viðtal pirraður og sagt kannski vitlausa hluti.“
,,Ég hefði átt að mæta í viðtöl, svona er þetta bara. Maður tekur ekki alltaf réttar ákvarðanir, þetta hefur komið fyrir áður hjá öðrum liðum og landsliðum.“
Gylfi segir að aðrir leikmenn hafi mætt í viðtöl og hann hefði líklega sagt sömu hluti.
,,Fjölmiðlar fengu nóg af leikmönnum frá Íslandi eftir leikinn, ég hefði sagt svipaða hluti. Ég skal mæta í viðtöl eftir næsta leik.“