Kolbeinn Sigþórsson, framherji Nantes, í Frakklandi og íslenska landsliðsins er mættur aftur á fullt eftir erfiða tíma. Þessi öflugi framherji hefur náð að æfa síðustu mánuði af krafti.
Kolbeinn er mættur aftur í íslenska landsliðið og kemur líklega við sögu í leikjum liðsins gegn Sviss og Belgíu í Þjóðadeildinni. Ljóst er að Kolbeinn gæti nýst landsliðinu afar vel, hann hefur skorað 22 mörk í 44 landsleikjum. Frábær tölfræði, margir töldu að íslenska landsliðið hefði saknað hans á Heimsmeistaramótinu í Rússlandi í sumar.
Meira:
Kolbeinn svarar forsetanum í ítarlegu einkaviðtali – „Ég hef ekki gert neinum eitt eða neitt“
Endurhæfingin Kolbeins hefur verið löng og ströng, hann viðurkennir að þetta hafi tekið mikið á en að komast aftur í landsliðið var einn af þeim hlutum sem hélt honum gangandi.
,,Það var klárlega eitt af markmiðunum í endurhæfingunni. Þetta gefur manni virkilega mikið að spila og vera í kringum þetta lið. Ég er stoltur að spila fyrir Ísland, maður fær gæsahúð í hvert einasta skipti sem maður klæðist landsliðstreyjunni. Fyrst og fremst er ég auðvitað bara ánægður með að vera orðinn heill heilsu. Þetta hefur verið mikil þrautarganga og hefur tekið mikið á, ég get ekki neitað því, en núna lítur þetta bara mjög vel út og ég horfi björtum augum fram á veginn,“ sagði Kolbeinn meðal annarss.