Freyr Alexandersson, aðstoðarþjálfari íslenska landsliðsins, ræddi við blaðamenn í höfuðstöðvum KSÍ í dag er nýr landsliðshópur var kynntur.

Freyr var spurður út í hvort það væri einhver staða sem hann og Erik Hamren hefðu áhyggjur af fyrir komandi verkefni í Þjóðadeildinni.

Það er ekki mikil breidd í hægri bakverðinum í landsliðinu en Freyr hefur þó ekki miklar áhyggjur. Þar spilar Birkir Már Sævarsson og hefur gert undanfarin ár.

,,Við höfum ekki áhyggjur af neinu eins og staðan er núna. Við höfum ekki rekist á neitt sérstakt enda rétt byrjaðir. Það gæti komið seinna,“ sagði Freyr.

,,Þú nefnir Birki Má og hægri bakvarðarstöðuna. Það er búið að efast um Birki í sex ár og hann er að eldast en kíkiði bara á frænda hans, hann er að spila fimmtugur.“

,,Við þurfum ekki að hafa miklar áhyggjur af þeim dreng. Ég hef engar áhyggjur af Birki Má í þessum leikjum, september, október, nóvember og hef aldrei haft.“

,,Það er vitað mál að við höfum ekki mikla breidd í hægri bakverðinum almennt en ég vil nefna það að Hólmar Örn Eyjólfsson spilaði þar á undirbúningstímabilinu fyrir HM og spilaði þann leik frábærlega.“