KA og Breiðablik gerðu markalaust jafntefli í Pepsi-deild karla í kvöld en leikið var á Akureyri við góðar aðstæður.

Blikar eru væntanlega súrir eftir jafntefli kvöldsins en liðið var manni fleiri frá 51. mínútu leiksins eftir að Aleksandar Trninic hafði fengið rautt spjald hjá KA.

Hér má sjá það góða og slæma úr leiknum.

Plús:

Það má gefa KA-mönnum plús fyrir að halda þetta út með tíu menn á vellinum. Stig er stig og gæti skipt sköpum.

Síðari hálfleikur var mun skemmtilegri en sá fyrri, mun meira af færum og fjöri en mörkin þó ekki sjáanleg.

Cristian Martinez hefur verið gagnrýndur í sumar fyrir sína frammistöðu í marki KA. Hann svaraði því í dag og átti virkilega góðan leik og steig svo sannarlega upp.

Mínus:

Blikar voru klaufar að klára þennan leik ekki. Tóku of mikinn tíma í að setja púður í sóknina. Leikurinn er bara 90 mínútur.

Aleksandar Trninic fékk rautt spjald hjá KA snemma í síðari hálfleik en hann fékk sitt annað gula spjald. Afar barnalegt spjald sem hann ákvað að næla sér í.

Mörk þýða skemmtun en við fengum þau því miður ekki í dag. Allt til staðar til að spila góðan fótboltaleik en skemmtanagildið var í lágmarki.

Fyrri hálfleikur var langt frá því að vera skemmtilegur. Maður var ekkert of langt frá því að sofna fyrir leikhlé.

Útlitið er ekkert of bjart fyrir KA-menn. Eru nú með níu stig eftir tíu leiki sem er jafn mikið og Fjölnir sem situr í fallsæti með verri markatölu.