Það má búast við því að stór hluti þjóðarinnar verði límdur við skjáinn á laugardag klukkan 13 þegar Ísland spilar sinn fyrsta leik í sögunni í lokakeppni HM. Andstæðingurinn er enginn annar en Argentína sem hefur einn allra besta knattspyrnumann sögunnar innanborðs, Lionel Messi.
Húsfélag eitt á óþekktum stað hefur þó annað á dagskránni en að horfa á einhvern fótboltaleik eins og meðfylgjandi mynd ber með sér. Á auglýsingunni stendur meðal annars: „Þá er komið að því – Sumargleði“.
Umrædd sumargleði á að standa frá klukkan 10-14 laugardaginn 16. júní og mun gleðin meðal annars felast í að hreinsa geymslugang, sópa bílskýli, hreinsa blómabeð, tína rusl og hreinsa gangstéttar.
Neðst í auglýsingunni stendur svo að ef fáir láti sjá sig verður þessi vinna einfaldlega keypt á kostnað húsfélagsins. Það verður eflaust forvitnilegt að sjá hversu margir mæta á svæðið.
Myndin birtist í hópnum Ferðagrúppa fyrir stuðningsfólk landsliðsins. Sá sem setur hana inn segir einfaldlega: „Ég myndi truflast við að sjá svona orðsendingu í stigaganginum.“ Annar bendir á að þetta jaðri hreinlega við ofbeldi.