„Þetta er búið að vera mjög næs. Maður þarf að passa sig á sólinni, hún er lúmsk. Það hefur verið smá vindur hérna en samt alveg hrikalegur hiti,“ sagði landsliðsmaðurinn Ari Freyr Skúlason í morgun.
Strákarnir hafa haft nóg að gera á milli æfinga; sumir hafa skellt sér í hjólreiðatúr, aðrir farið í ísbað á meðan sumir hafa notið meðhöndlunar hjá sjúkraþjálfurum íslenska liðsins. Ari Freyr segir að hann hafi til dæmis spilað borðtennis og pílukast til að drepa tímann.
„Svo eru tölvuleikir fyrir nördana,“ sagði Ari Freyr í viðtali við 433.is í morgun.
Hvað ertu að spila helst? „Ég hef nú verið að rústa Birki Má í NBA reyndar, svona inn á milli og svo er maður aðeins að koma inn í þetta Fortnite dæmi.“
Hvernig gengur það? Það gengur mjög illa. Ég er skelfilegur í þessu,“ sagði Ari Freyr og skellti upp úr.