Keppni í Pepsi-deild karla hefst 27. apríl með tveimur leikjum en 1. umferðin klárast svo degi síðar. Það stefnir í að keppnin í ár verði hörð, bæði á toppi og á botni.
Valur hefur titil að verja í Pepsi-deildinni en liðið hafði mikla yfirburði á síðustu leiktíð, ekki eru nein merki á lofti um að keppnin verði öðruvísi í ár. Í Kaplakrika er Ólafur Kristjánsson nýr þjálfari og hann hefur gert miklar breytingar á leikmannahópi liðsins. Miðað við veturinn mun það taka einhverja leiki í sumar fyrir FH að verða að liði sem getur barist við Val.
KR-ingar fara bjartsýnir inn í mótið þrátt fyrir að leikmannahópur liðsins hafi oft verið sterkari, heim er mættur Rúnar Kristinsson sem er galdramaður í Vesturbænum. Seinast þegar hann stýrði liðinu var bikarfögnuður orðinn að hefð í Vesturbænum.
Í Garðabæ og Kópavogi gera menn sér vonir um að liðin geti blandað sér í þessa baráttu, til að svo verði má lítið út af bregða. Keflavík og Fylkir eru nýliðar í deildinni í ár en liðin hafa bæði mikla reynslu úr efstu deild, hún gæti skipt miklu máli. Sumarið gæti orðið erfitt hjá þeim og sömu sögu má segja um Víking Reykjavík og ÍBV sem eru nokkuð óskrifuð blöð.
Spáin:
12 sæti – Víkingur R.
Keflavík – 11. sæti
Það er ekki víst hvernig Keflavíkurnæturnar verða í sumar en liðið er komið aftur í efstu deild undir stjórn Guðlaugs Baldurssonar. Keflavík er með lið stemmingar en það gæti skort gæði í leikmannahóp liðsins til að það héldi sæti sínu í efstu deild. Hjá Keflavík eru hins vegar margir öflugir leikmenn og ef Guðlaugur nær að bæta við einum eða tveimur gæða leikmönnum fyrir mót er allt hægt. Miðað við stöðu leikmannahópsins í dag þarf margt að ganga upp svo liðið verði ekki í kjallaranum þegar talið verður upp úr pokanum í haust.
Lykilmaður – Jeppe Hansen
X-faktor – Lasse Rise
Þjálfari – Guðlaugur Baldursson
Komnir:
Jonathan Mark Faerber
Bojan Stefán Ljubicic
Aron Freyr Róbertsson
Farnir:
Jónas Guðni Sævarsson
Jóhann Birnir Guðmundsson
